BAGUIO CITY – Napilaanen ti kaso a robbery with violence or intimidation ti suspek iti snatching incident sadiay Toyong, Pico, La Trinidad, Benguet idi rabii ti Sabado, Oktobre 22.
Nabigbig daytoy a ni Dexter Miguel Dulay, 26-anyos, tubo ti Kibungan, Benguet ken residente ti Km 5, La Trinidad, Benguet.
Ti biktima ket ni Grazy Walley Tauli, 22-anyos ken residente iti Toyong, Pico, La Trinidad Benguet.
Maibasar iti report ti La Trinidad MPS, nagtaud ti biktima iti pagadalan ken paturong iti pagtaenganna.
Nupay kasta, kabayatanna ti pannagna ti biktima ket nadlawna nga adda ti mangsursurot kenkuana ken killaat latta nga inagaw ti suspek ti cellphone daytoy nga aggatad ti P10,000.
Dinangdangran pay ti suspek ti biktima tapno maalana ti cellphone sakbay a timmaray daytoy.
Nakapukkaw ti biktima rason a kinamat ken hinarang dagiti by-standers ti suspek.
Rinespondean met daytoy dagiti otoridad a nangitunda iti panakatiliw ti suspek.
Narekomendaran ti suspek ti P100-K a piyansa para iti temporaryo a pannakawaya-wayana.
