BANGUED, ABRA- Linapdan itay kanikadua, Mayo 15, iti Regional Trial Court (RTC) Branch 1 idiay Bangued, Abra ti pannakaipatungpal iti tallo a bulan a “suspension” kontra iti maysa a barangay chairman ken lima a kagawad kadua ti Sangguniang Kabataan chairman kalpasan a naipaayan iti “merito” ti kiddaw a petition para iti Temporary Restraining Order (TRO).
Linapdan ni RTC Branch 1 Acting Presiding Judge German Ballesteros III ti pannakaimplentar iti siam a pulo nga aldaw a preventive suspension ni Barangay Calaba, Bangued Chairman Renato P. Brasuela ken lima a barangay kagawad kaduada ti Sangguniang Kabataan chairperson gapu iti panagaramidda iti barangay ordinance a pannakaipataw iti pannusa a “pammapatay” para iti “third offense” iti iligal a panangibelleng iti basura.
Naadal ni Judge Ballesteros ti “irreparable injury” nga agresulta iti pannakaakusar kadagiti barangay officials isut gapuna a nangipaulog daytoy iti Temporary Restraining Order nga epektibo iti pito pulo nga oras.
Imbilin ni Ballesteros kada Bangued town Councilors Serafin Alzate, Salvacio B. Borja, Mark Anthony R. Go, Rowena B. Bringas, Benedict V. Bersamira, ken Byrone B. Alzate kasta met dagiti opisiales nga isardeng ti pannakaipatungpal iti May 6, 2024 Order of Preventive Suspension nu sadinno, immanamong ni Bangued town mayor Mila A. Valera.
Naibilin met iti korte kadagiti naakusaran a barangay officials ken “respondent municipal councilors” ken dagiti dadduma pay nga opisial a tumabuno iti “summary hearing” maipapan iti petision para iti Writ of Preliminary Injunction idi kalman, May 16 ken naibilin kadagiti naakusaran a barangay officials nga agbayad iti P200,000 a bond.
Maipalagip nga idi Mayo 6, imbilin ni Bangued Mayor Valera kenni Brasuela ken lima a barangay officials a bumaba iti puesto kalpasan a napaneknekan a “guilty” wenno nagbasol iti Sangguniang Bayan iti Bangued gapu iti “Grave Misconduct, Grave Abuse of Authority, Gross Neglect of Duty, Gross Dishonesty, Conduct Prejudicial to the Best Interest of the Service” kalpasan nga inaprobaranda ti maysa nga ordinansa idi Pebrero nu sadinno, madusa dagiti indibidual nga agibelbelleng iti basura iti multa a P1,000 para iti umuna a panaglabsing,P1,000 ken walo nga oras a “community service” para iti maikadua a panaglabsing, ken “mapaltugan” iti maikatlo a panaglabsing.
Ti nasao nga ordinansa iti barangay ket inaprobaran da Brasuela, dagiti kawagawad a kas kada Marjun S. Santiago, Rosemel B. Viado, Marlbour Jude B. Valera, Carmelita A. Venus, ken SK barangay chairman Darryl B. Blanes, ngem saanda nga impakaamo iti Sangguniang Bayan tapno mareview wenno maadal manen sakbay daytoy a maipasa ken maiyemplementar.
