“Overwhelmed” ni Attorney Ruth Lalio kalpasan a pimmasa daytoy iti 2024 BAR Examination- ti maikapat a gundaway a pinadasna ti nagpaisidong iti nasao nga eksaminasyon.
Iti panakiuman ti Bombo Radyo kenni Atty. Lalio, imbinglayna a narigat ti nagdalananna iti panagadalna iti abogasya gapu ta kagiddan dayta ket mangmangged daytoy kas administrative officer iti Benguet State University-La Trinidad Campus.
Sumagmamano kadagiti karit a sinangona bayat ti panagadala iti abogasya ti panangimanihar iti oras, kasasaad iti mental a salun-atna nangruna idi panawen ti pandemya, kasta metten ti pinansyal nga aspeto.
Saan a nakapasa ni Atty. Lalio bayat iti umuna, maikadua, ken maikatlo a panagexam daytoy partikular idi 2013, 2014, ken idi 2015.
Agarop maysa a dekada kalpasan ti naudi a panakapaay daytoy ket pinadasna manen nga agexam ket balligi ngarod a pimmasa.
Mainaig iti dayta, inaklon ni Atty. Lalio a kagiddan ti kinaabogadona ket mariknanan ti dakdakkel a responsibilidadna iti pamilya daytoy ken iti komunidad.
Inladawanna a ti panagbalinna nga abogado ket maysa a narigat ngem fulfillig a propesyon.
Iti agdama, awan pay panggep ti abogada nga agtrabaho maitunos iti impasana a propesyon gapu ta adda pay responsibilidadna iti agdama nga akemna idiay Benguet State University-La Trinidad Campus.
Ni Atty. Ruth Lalio ket tubo iti Cotcot Bangao, Buguias, Benguet ken immunan a nagturpos iti kurso a Bachelor of Science in Agriculture Education.
Iti maikapat a panagsagana daytoy para iti Bar Examination, nagrebyu daytoy iti Villasis Law Center Review Program a sigun kenkuana ket nagbalin a dakkel a katulunganna iti panagballigina iti abogasya.//Bombo Rob Dominguez
