Pinalawa pay iti DSWD-CAR ti panangimplementar iti Pag-abot Program tapno matulungan dagiti indibidual ken pamilia nga agnanaed wenno agtatrabaho iti kalsada.
Sigun kenni OIC Regional Director Enrique Gascon, mangideployda kadagiti project development officer kadagiti capital town ken siudad iti rehion, ken agbalin a 24/7 ti operasion tapno ad-adu ti matulungan nga agkasapulan.
Panggep iti programa a maiyaddayo iti pangta dagiti adda iti kalsada ken maisublida iti nasaysayaat a kasasaad, karaman ti panangitugod kadakuada iti center ken panagtulong a makasubli iti komunidad.
Iti agdama, dumanon iti sangapulo nga indibidualen ti natulungan iti agdama a tawen. Naipasidong dagitoy iti profiling ken assessment tapno maipaayan iti umno a tulong a kas iti pinansial iti sidong iti AICS ken dagiti livelihood program.
Adda metlaeng iti processing center idiay Puguis, La Trinidad, Benguet para iti temporario a panangaywan bayat a maisimsimpa dagiti kasapulan iti panangiyawid kadakuada.
Maguygoyugoy met ti publiko nga ipadamag iti pulis wenno iti DSWD-CAR hotline a 0907-685-3814 dagiti makitkita nga agkasapulan iti tulong iti kalsada.
