Agpapaimbag paylaeng sadiay Baguio General Hospital and Medical Center dagiti tallo a pasahero a nadangran kalpasan a naidungpar ti nagluganan dagitoy a bus iti kasabat daytoy a truck sadiay Marcos Highway, Badiwan, Tuba, Benguet idi kalman.
Maibasar iti report ti pulisya, napasamak ti aksidente iti 7:50 ti rabii idi kalman ngem naireport laeng kadakuada iti pasado alas nuebe ti rabii idi kalman.
Dagiti dua a karaman a lugan ket pakairamanan ti Daewoo Truce bus nga imanmaneho ti maysa a lalaki nga agtawen iti 42, addaan iti asawa, bus driver, ken residente idiay Naguilian, La Union bayat a ti Mitsubishi van truck ket imanmaneho ti maysa a lalaki nga agtawen iti 48, single, truck driver, tubo sadiay Zamboanga City, Del Norte ken residente sadiay Muntinlupa City.
Ti Daewoo Bus ket naituding a paturong sadiay La Union ken kabayatan ti panagdalyasatna sadiay Badiwan, Tuba, Benguet ket naikadlis ti pilid daytoy gapu iti nabasa a kalsada gapu iti panagtodona.
Gapu iti dayta, naawanan iti kontrol ti driver ti bus a nangitunda iti panag-alis daytoy iti opposite line nga isu ti gapuanan ti panakabangga daytoy iti pasang-at a Mitsubishi Van Truck.
Gapu iti impact daytoy, nadangran ti tallo a pasahero ngem dagus dagitoy a naiturong dagitoy sadiay Baguio General Hospital and Medical Center.
