Kinondenar ti Department of Foreign Affairs (DFA) ita nga aldaw ti kaudian a panag-atake ti rebelde a Houthi a nangpuntiria ti MV Tutor a paturong iti Red Sea.
Sigun iti nasao nga ahensia, napasamak ti panag-atake itay kanikadua (June 12) ngem saanen a nadakamat ti bilang dagiti Pilipino iti uneg ti barko ken awan kadagitoy ti nadangran.
Impasigurado met ti gobierno ti Pilipinas nga aramidenda amin nga addang tapno maipasigurado ti kinatalged dagiti Pilipino iti uneg ti barko.
Inawagan pay ti Department of Foreign Affairs ti amin a miembro ti United Nation a salaknibanda ti karbengan dagiti seafafers.
Kabayatanna, umap-apela ti maysa a crew member ti Tutor a ni Emerson Loria ti tulong kabayatan ti panangidetalyena ti maatap a panag-atake ti Houthi kadagitoy.
Sigun kenkuana, pinuntiria dagiti nasao a grupo ti barko dagitoy babaen ti panagpasabog.
Kinunana pay nga agarup 22 a Pilipino ti adda iti MV Tutor pakairamanan ti kapitan dagitoy.
Kas panag-obserbar ni Loria, ti kasasaad sadiay ket kumarkaro.
Aklonen a marigrigatanen dagitoy iti uneg ti barko gaputa agkurang dagitoyen ti makan, danum, ken kasta met ti langis.
Dinakamatna a nagkari ti gobierno ngem agingga tatta ket saan pay a naispal dagitoy.
