BAGUIO CITY – Maisubli ita nga aldaw ti Sabado, August 22 ti tallo nga aldaw tunggal lawas a Mall and Market Schedule (M&Ms) ditoy siudad ti Baguio.
Maibasar daytoy iti pammilin manipud iti opisina ni Mayor Benjamin Magalong.
Nupay kasta, agtalinaed a lockdown ti Baguio City Public Market tunggal Domingo agingga nga adda ti baro a paka-ammo manipud iti lokal a gobierno.
Mapalubosan latta met dagiti sumagmamano nga establishimiento nga aglukat iti aldaw ti Dominggo.
Maibilbilin pay latta iti publiko ti panangsurotda kadagiti pagalagadan ti community quarantine ditoy siudad kas iti umno a panangisuot ti face mask ken face shield, panagobserbar iti social distancing ken ti saan nga iruruar no saan a napateg unay ti pagna.
Maipalagip nga immunan a nai-schedule ti 3-times a week nga M&Ms ditoy Baguio ngem nabaliwan idi napalabas a bulan gapu iti isyu ti seguridad ken panagngato ti kaso COVID-19 ditoy lokalidad.
