Nangrugin ita nga aldaw ti “tigil-pasada” ken panagprotestada nga impatungpal ti Transport group a Manibela iti National Capital Region .
Daytoy ket tapno mangkiddaw iti gobierno a maipaayan dagiti saan a nakapagconsolidate a jeepney drivers ken operators iti maysa a tawen a “provisional authority” kasaruno ti Abril a trenta a deadline para iti consolidation.
Sigun kenni Manibela chairperson Mar Valbuena, kayatda nga agaramid ti “jeepney prototype” kadagiti local manufacturers a makaragpat iti standard ti gobierno.
Guyguyuguyenna met ti Department of Transportation (DOTr), Land Transportation Franchising and Regulatory Board (LTFRB), ken Department of Trade and Industry (DTI) tapno maaprobaran ti immuna a “prototype” nga inaramidda.
Immapel pay ni Valbuena kenni President Ferdinand “Bongbong” Marcos Jr. a dinggenda ti kiddaw dagitoy ken saanna a patien ti ibagbaga dagiti dadduma nga indibidual a kontrada iti Public Utility Vehicle Modernization Program (PUVMP).
Ti “tigil-pasada” nga impatungpal ti nasao a grupo ket agbayag agingga Hunio a dose iti agdama a tawen.
