BAGUIO CITY – Nakasagana ti DENR-Cordillera a makitrabaho iti City Government of Baguio para iti aniaman a technical assistance a mabalinda nga ipaay, partikular iti panakaipasdek ti environmentally-friendly eco-park iti deppaar ti Irisan Dumpsite.
Sigun iti ahensia, iwanawan met ti EMB-Cordillera ti panangimplementar ti Baguio LGU iti Ecological Solid Waste Management Act ken ti sitwasyon iti dumpsite tapnu masigurado a maprebentaran ti napeggad a kondisyon ken risgo iti salun-at dagiti tattao nga agtatrabaho ken agnanaed iti asideg ti nasao a basuraan.
Immunan nga inlawlawag ti Baguio LGU babaen kenni General Services Office head Engr. Eugene Buyucan nga aramidenda paylaeng ti obligasyonda a pagbalinen nga eco-park ti Irisan Dumpsite.
Inlawlawagna a ti Irisan Dumpsite Eco-Park Development Plan ket naisumitiren iti Court of Appeals idi pay April 2019 ken ti pondo para iti daytoy a dumanon iti P10-M ket inlatangen ti lokal a gobyerno.
Nupay kasta, inaklonna iti pammalawagna iti DENR-Cordillera a saan a dagus a maiyemplementar ti nasao a plano gapu iti naurnong nga abono iti nasao a disso ken ti kondisyon ti daga sadiay a nasken a masigurado nga stable sakbay ti implementasyon ti plano.
Binigbig pay ni Buyucan a nabalkot iti plastik dagiti marunrunot a basura a makolkolektar isut gapuna a nagalada kadagiti casual employees ken nadutukan dagitoy a mangikkat kadagiti nasao a plastik ken dadduma a saan a marunrunot a basura a nainayon kadagiti makolkolektar a marunrunot a basura.
