BAGUIO CITY – Maisingsingasing ti panakaipatungpal ti teleconsultation wenno virtual consultation kadagiti amin a pasyente iti probinsya ti Benguet.
Kasaruno daytoy ti panakapunno manen dagiti pagagasan iti probinsia gapu iti panagadu ti kaso ti COVID-19 sadiay.
Iti panakiuman ti Bombo Radyo Baguio kenni Governor Melchor Diclas, kinunana a babaen iti teleconsultation ket maliklikan ti panagturong dagiti adu unay a pasyente kadagiti pagagasan ken ti nabayag a panaguray dagitoy gapu iti kinakumikom dagiti health workers.
Kinunana a nasken a tumawag wenno agpakonsultada dagiti pasyente kadagiti doktor babaen iti social media wenno iti telepono tapnu ma-assses pay dagitoy no nasken nga agturung wenno ma-admit dagitoy iti pagagasan.
Kiniddawna met ti umno a koordinasyon kadagiti district hospitals ken iti provincial hospital sakbay a mangipatulod kadagiti pasyente tapnu maisagana ti pakaiturungan dagitoy a ward.
Iti agdama, napunnon ti Benguet General Hospital ken dagiti isolation facilities ti probinsia.
