Manamnama nga ad-adda pay a bumaba ti temperatura iti siudad ti Baguio kadagiti sumarsaruno nga aldaw.
Iti panakiuman ti Bombo Radyo kenni Mar Joseph Santos, Weather Observer iti PAGASA-Baguio, kinunana a marikna ti ad-adda pay a nalam-ek a temperatura ita a bulan agingga inton Pebrero.
Maipalagip nga idi napalabas a tawen, dumanon iti 9.8 degrees celcius ti kababaan a temperatura a napasaran ti siudad bayat a ti kabaan a nairekord iti pakasaritaan iti City of Pines ket 6.3 degrees celcius idi met tawen 1961.
Iti sabali a bangir, kinuna ni Santos a posible a mapasaran ti La Niña phenomenon iti umuna a kwarter ti agdama a tawen nu sadino 63% ti tsansa iti daytoy kas maibasar iti bulletin ti state weather bureau.
Innayon ni Santos nga iti agdama ket adda iti La Niña alert ti Luzon rason a mapaspasaran ti panagtudtudo nga ituntunda iti shearline wenno ti panagbangga ti napudot ken nalamiis nga angin.
Kabayatanna, nairuar metten dagiti baente singko a nagan dagiti bagyo a posible a dumalapos ita a tawen pakairaman ni Auring, Bising, Crising, Dante, Emong, Fabian, Gorio, Huaning, Isang, Jacinto, Kiko, Lannie, Mirasol, Nando, Opong, Paolo, Quedan, Ramil, Salome, Tino, Uwan, Verbena, Wilma, Yasmin ken Zoraida.//Bombo Mera Pacpacan
