Till death do us part wenno agingga a ni patay ti magmagsina kadata, nasakit no amirisen ti kaipapananna a sao ngem paneknekanna met ti kinapudno a panaggayat ti dua nga agin-innayat.
Daytoy a karin-kari ket gagangay nga ibaga dagiti agnobia ken nobio wenno ti bride ken groom a mangipasimudaag iti panagkumitda iti panagkaykaysada.
Daytoy ti pinaneknekan ti maysa a lalaki sadiay Malasiqui, Pangasinan kalpasan nga inkallaysana ti nobyana iti uneg ti maysa nga ospital iti baet a nacomatose daytoy.
Naangay ti kasar da Jayson Lopez de Guzman ken Jenny Calimlim-de Guzman iti uneg ti pagagasan idi September 6, 2024 bayat a nakaidda ni Jenny, gaputa nadiagnosed daytoy iti brain tumor.
Nupay kasta, napalabas ti sumagmamano nga oras kalpasan ti kasarda, idiay metten a pimmusay ni Jenny.
Imbati ni Jenny iti asawana ti dua nga annakda nga agtawen iti lima ken innem a bulan a maladaga.
Iti baet a nakaladladingit ti panagpatingga ti seremonia ti nasao a kasar, naragsakan latta ti pamilia ni Jenny agsipudta iti maudi a gundaway iti biagna ket nagbalin daytoy a bride.
