Nasuspendir ti trabaho dagiti lokal a gobyerno ken pribado a sektor kasta metten ti klase kadagiti apektado a lugar idiay United Arab Emirates gapu pailaeng iti napasamak a napigsa a panagtudo a nangitunda ti nakaro a panaglayos idi Martes, Abril dise sais.
Iti interview ti Bombo Radyo kenni Bombo International News Correspondent Erlinda Dagus idiay Dubai, kinunana a naputed metlaeng ti suplay ti kuryente ken internet iti sumagmamano a paset ti United Arab Emirates gapu iti nasao nga insidente.
Sigun pay kenni Erlinda, ti cloud seeding nga impatungpal ti gobyerno ti makitkita a rason iti nakaro a panaglayos.
Impeksana a daytoy ti umuna a gundaway ita a tawen a napasaranda ti nakaro unay a panaglayos nupay mapaspasaranda daytoy tunggal agtudo.
Patien ni Erlinda a maysa a rason iti panaglayos ket ti kinaawan ti drainage system isu’t gapuna a ngimmato ti lebel ti danum.
Iti baet dayta, awan met ti nadangran nga indibidual idiay Dubai agsipud ta immunan a nagpalagip dagiti otoridad sakbay ti cloud seeding.
Nupay kasta, adda ti maysa nga indibidual a pimmusay iti kabangibangda a lugar.
Iti agdama, nakaalerto ti lokal a gobyerno idiay Dubai kasaruno ti napasaran a kalamidad.//Bombo Rosemarie Bulsao
