BAGUIO CITY – Dumakdakkel ti transaksion ti nateng iti Benguet Agri-Pinoy Trading Center (BAPTC) sipod nagrugi ti operasyon daytoy idi napalabas a tawen.
Impannakkel ni Dr. Violeta Salda, Chief Operating Officer ti BAPTC a 25-30 percent ti nateng manipod iti Benguet ken Mt. Province ti maiturturong iti nasao a pasilidad malaksid iti nabayagen a La Trinidad Vegetable Trading Post.
Kinunana a dumanon itan iti nasurok 260 nga asosasyon ken kooperatiba a bukbuklen ti nasurok 30,000 a mannalon ken vegetable traders ti agar-aramat iti BAPTC.
Dinakamatna a kaaduan kadagiti mannalon nga agiturturong iti natengda sadiay BAPTC ket manipod sadiay Mankayan, Buguias ken Kibungan.
Impanamnamana met ti panakapintas ti sistema ken operasyon ti pasilidad kas iti packaging ken marketing dagiti nateng manipod Benguet nangruna ta agsapsapolda pay laeng kadagiti makuna nga institional buyers wenno dagiti permanente nga aggatang kadagiti nateng dagiti mannalon.
Kabayatanna, inlawlawag ni Dr. Salda a saanda a mapilit dagiti stakeholders iti La Trinidad Vegetable Trading Post nga umakar iti BAPTC gaputa karbengan dagiti negosyante ken mannalon no sadino ti pangilakuanda kadagiti natengda.
Nupay kasta, agtultuloy ti panangguyugoyda kadagiti interesado nga asosasyon dagiti mannalon nga agaramat kadagiti nakasagana a pasilidad iti BAPTC.
