Pinilaan ti Quezon City Police District(QCPD) ti reklamo dagiti sumagmamano a miembo ti transport group MANIBELA kasaruno ti inpatungpal dagitoy a transport strike idi April 15 agingga April 16 kas panagprotesta iti umadanin a deadline ti franchise consolidation.
Sigun iti Quezon City Police District(QCPD), naglabsing ti tallo a daras iti Public Assembly Act of 1985 ti nasao a transport group, pakairamanan ti alarm and scandal, resistance and disobedience, ket ti direct assault kadagiti otoridad.
Innayon ti nasao nga opisina a saan nga immanugot iti dialogue dagiti lider ti maseknan a grupo ken saanda nga inkaskaso ti direktiba nga umakarda kadagiti freedom park nga agprotesta.
Malaksid iti dayta, imbinglay metlaeng dagiti opisyal ti QCPD nga awanan ti permit ti MANIBELA manipod iti lokal a gobyerno ti Quezon City sakbay a naipatungpal ti transport strike wenno panagprotesta dagitoy.
Karaman kadagiti sumungbat iti nasao a reklamo ni MANIBELA Chairperson Mar Valbuena, MANIBELA President Regie Manlapig,kasta met dagiti agtagikua kadagiti jeepney a naaramat iti rally a da Jasmine Bordalba Denition, ken Pacifico Dasalla Martin Jr.
