BAGUIO CITY – Ikagkagumaan ken an-anusan dagiti drivers ken operators nga agbiahe iti baet ti agtultuloy a panagngato ti presyo dagiti produkto a petrolyo.
Iti interview ti Bombo Radyo Baguio kenni Anert Bangsael Chairman ti maysa nga Transport Cooperative ditoy siudad, kinunana nga adu ti mangibaga nga isardengda ti agbiahe ngem ikagkagumaanda latta tapnu adda ti pagluganam met dagiti pasahero.
Kinunana nga ituloyda pay ti agbiahe agingga nga awan pay ti desisyon ti gobierno seknan iti apela ti transport sector a kanayunan a pamasahe.
Inyunay-unayna met nga adayu a nababa ti makidkiddaw nga P1 wenno P3 a kanayunan a plete ditoy rehiyon wenno iti lokalidad nu idilig iti kidkiddawen dagiti grupo sadiay NCR.
Impeksana a nasken koma nga maawatan met dagiti otoridad ti sitwasyon ti kalkalsada iti lokalidad a kaadoan ket pasang-at isunga nangato ti makun-kunsumo nga krudo/gasolina.
Kabayatanna, inayonna nga adda dagiti mang-manggegna a posible a panangisardeng dagiti sumagmamano a drivers nga agbiahe nu ngumato pay manen ita nga aldaw ti presyo ti petrolyo.
Inlawlawagna a nasken nga mangngegan met koma ti arungaingda nangruna ta saan met nga permanente ti ipapaay ti gobierno nga subsidiya malaksid nga mapan amin iti nangato a presyo ti krudo ti igatangda koma met iti pagkasapulan dagitoy.
