BAGUIO CITY – Agtigtignay itan ti lokal a gobyerno ti La Trinidad, Benguet tapnu matulongan dagiti adu a cut flower growers sadiay a naapektaran ti pagbiagan gapu iti panakalugida iti napalabas a lawas.
Maipalagip nga adda dagiti cut flower growes iti La Trinidad a nangibelleng iti inapitda a sabong ken adda pay dagiti nangbaybay-an lattan kadagiti mulada kalpasan nga awan ti gimmatang kadagitoy.
Iti panakiyuman ti Bombo Radyo Baguio, kinuna ni Mayor Romeo Salda a natalantan ti pakaseknan dagiti cut flower growers iti taripnongda idi kalman ken inkonsiderada dagitoy kadagiti mabalin a tulong nga agtaud iti lokal a gobyerno.
Imbilinnan iti Municipal Agriculture Office ti panakai-profile dagiti apektado a cut flower growers ti munisipyo ken no kwalipikado dagitoy ket mairamanda kadagiti benipisaryo iti livelihood assistance nga ipapaay ti municipal government ken iti mapadpadaanan a TUPAD Work Program.
Dinakamatna metlaeng nga adda ti P5,000 loan assistance manipud iti Department of Agriculture a mabalin a pagnumaran dagiti cut flower growers sadiay ngem nasken a nakarehistro dagitoy iti Registry System for Basic Sectors in Agriculture ti ahensia.
Maipalagip a napalubusan ti libre a panagilako dagiti cut flower growers ken vendors iti deppaar ti Km. 5 kas tulong ti lokal a gobyerno kadagitoy.
