Maikatlon a daras nga adda ti napasamak nga engkwentro iti nagbaetan dagiti soldado ken dagiti rebelde a grupo ita a tawen sadiay Balbalan, Kalinga.
Iti panakiuman ti Bombo Radyo kenni Captain Melchor Keyog, Civil-Military Operations Officer ti 503rd Infantry Brigade,masapol ti naan-anay a panakapaksyat dagiti rebelde gapu ta maysa daytoy kadagiti makaap-apektar iti panagdur-as nangruna dagiti nasusulinek a paset ti nasao a lugar ken saan a makastrek dagiti serbisyo nga ipaay koma ti gobyerno.
Sigun kenni Keyog,agtultuloy ti nainget a panangipatpatungpalda ti insurgency campaign kas ti information drive nangruna kadagiti pagadalan tapno maliklikan ti panakarecruite dagiti agtutubo ken dagiti estudyante a makipaset kadagiti nasao a klase ti grupo.
Iti sabali a bangir, maguyguyugoy dagiti kakabagyan wenno pamilya dagiti miembro ti rebelde a grupo a tulunganda ti gobyerno a pagsurenderin dagitoy.
Innayon ni Keyog a masapol ti panakitinnulong ti pamilya dagiti rebelde gapu ta awan ti direkta a kontak ti gobyerno kadakuada.
Malaksid iti dayta, babaen iti panakitinnulong ti pamilya dagiti rebelde ket posible nga ad-adda a mapapartak ti panagsurrender dagitoy.
Kagiddan dayta, impsigurado ti opisyal nga adda ti programa ti gobyerno para kadagiti miembro ti rebelde a grupo nga agsubli iti linteg kas ti pinansyal tulong, ken livelihood programs.//Bombo Rob Dominguez
