BAGUIO CITY – Kidkiddawen dagiti stakeholders ti vegetable industry iti lokalidad ti tulong ti Police Regional Office Cordillera (PROCOR), partikular ti Baguio City Police Office (BCPO) iti panakalapped ti panakaiserrek ditoy siudad dagiti maatap nga imported a repolyo manipud China nga iligal a naiserrek iti pagilian.
Sigun kenni Agot Balanoy, General Manager ti maysa a kooperatiba dagiti mannalon, nagsuratda kenni PROCOR regional director Police Brigadier General Ronald Lee mainaig iti nasao a pakaseknan.
Kinunana a nasken a nainget a mabantayan dagiti border checkpoints pastrek iti siudad nangruna dagiti lugan nga agtataud sadiay Metro Manila.
Dinakamatna a ti nadamagda ket naisang-at ditoy siudad dagiti nasao a repolyo babaen iti panakaila-okda kadagiti prutas ken gulay-tagalog.
Inyunay-unayna nga iti tulong dagiti pulis ket masukimat ken malapdan ti panakaiserrek dagiti smuggled a repolyo ditoy lokalidad.
Naamuan met a manarimaan ti pananginspeksion ken panagsukimat ti Department of Agriculture-Cordillera iti maibagbaga a presensia dagiti imported a repolyo a mailaklako iti Hangar Market iti siudad ti Baguio.
