BAGUIO CITY – Nakalukat latta ti turismo iti munisipyo ti Sagada, Mountain Province iti baet ti nagsaruno a panakaipasidong ti probinsia iti Alert Level 4 ken Alert Level 3.
Sigun kenni Mayor James Pooten Jr., iti baet daytoy ket bimmaba ti bilang dagiti turista a nagturong ken agturturong sadiay gapu paylaeng iti pangta ti COVID-19 ken ti Omicron variant daytoy.
Innayonna a naka-apektar metlaeng iti tourist arrival ti munisipyo ti nagduduma a restrictions kadagiti lugar a pagtataudan dagiti turista ken ti lugar a turongen dagitoy.
Imbinglayna met a kadawyan nga agturturong sadiay Sagada ket dagiti turista manipud iti National Capital Region.
Sigun pay iti mayor, nainget latta dagiti proseso a pagdalanan dagiti turista nga agturturong sadiay Sagada.
Dinakamatna a karaman ditoy ti requirement iti panag-rehistro nga umuna ti turista iti ‘Umali Kayo Registration’, panangiparang iti negatibo a resulta ti RT-PCR test ken vaccination card.
Nainget a maipatpatungpal ti minimum health protocol ken dagiti paglintegan kadagiti tourism sites.
Innayon ti mayor a dagiti kangrunaan a mapaspasayar ita sadiay Sagada ket dagiti open spaces a tourist spots kas kadagiti waterfalls, agri-tourism farm, sunrise-sunset viewing ken dadduma pay.
Nupay kasta, maiparit ti panagbisita kadagiti gukayab tapnu maliklikan ti body contact ti turista kadagiti tour guides.
