MT. PROVINCE – Manarimaan ti panagsagana dagiti amin nga election officers para iti pannakaisayangkat ti Election Registration Board (ERB) Hearing wenno ti paannakaprobar dagiti nagparehistro nga indibidual idi Enero agingga Marso iti agdama a tawen.
Iti pannakiuman ti Bombo Radyo kenni Atty. John Paul Martin, Election Supervisor ti COMELEC-Mt. Province, kinunana a dumanon iti 4,236 ti nagparehistro manipud kadagiti 10 a munisipyo ti Mt. Province.
Manamnama a maaprobaran ken mainayon daytoy iti agdama a bilang ti botante iti nasao a probinsiya.
Sigun kenni Atty. Martin, suspendedo ti panagparehistro kabayatan ti ERB Hearing tapno maipamaysa ti atensyon dagiti election officers iti nasao nga aktibidad.
Kabayatanna, immuna a naituding intun April 20 ti ERB Hearing ngem nairana iti work from home dagiti empleyado.
Gapu iti dayta, naiyarkar ti pannakaipatungpal daytoy intun April 21.//mp4
