BAGUIO CITY – Nakemmeg ti maysa a lalaki gapu iti panangibiahena iti marijuana sadiay Purok 6, Bulanao, Tabuk City, Kalinga idi kalman.
Nabigbig daytoy a ni Omar Luis Espino Serrano, 21-anyos ken residente ti Kalaw St., Brgy 127, Caloocan City.
Sigun iti Tabuk City Police Station, nakaawat dagiti otoridad iti impormasion a nakaimet ti suspek iti marijuana bayat a nakalugan iti bus nga agturong sadiay Tabuk City.
Dagus a nangipatungpal dagiti pulis iti checkpoint ngem nadlaw daytoy ti suspek isut gapuna a dimmasaag daytoy iti bus.
Nupay kasta, sinurot daytoy ti maysa a kameng ti PDEA ken nakumpiskar kenkuana ti uppat a dadakkel a tubular transparent plastic ken maysa a bassit a tubular transparent plastic a naglaon iti maatap a bulong ti marijuana.
Mapattapatta nga agdagsen dagiti nakumpiskar a marijuana iti 4,020 grams ken aggatad iti P482,400.
Naiturong dagiti kontrabando iti kustodia dagiti otoridad para iti disposision bayat a sumangsango ti suspek iti kaskenan a kaso.
