BAGUIO CITY – Pagparparikutan ita ti Benguet General Hospital (BeGH) ti umad-ado a volume ti infectious waste nga agtataud iti pagagasan gapu paylaeng iti pandemya nga ituntunda ti COVID-19.
Sigun kenni Dr. Meliarazon Dulay, dadaulo ti BeGH, kaaduan kadagiti nasao a kita ti basura ket dagiti Personal Protective Equipment (PPEs) nga ar-aramaten dagiti health personnels sadiay.
Kinunana a dagiti infectious waste ket maiturturong sadiay Tarlac babaen ti pananagbunag ken panangibiahe ti accredited hauler a kinontrada ken agpaut iti makatawen ti kontrata dagitoy.
Sigun kenkuana, adda ti container nga ipapaay ti nasao a hauler nga isu laeng ti pakaikabilan dagiti infectious waste ti BeGH.
Mangnamnamada met nga ad-adda nga umado dagiti infectious waste a mapataud ti BeGH gapu iti agtultuloy a panakailista ti kaso ti COVID-19 iti probinsya ti Benguet ken iti panakaiturong dagitoy iti nasao a pagagasan.
Dinakamat pay ni Dr. Dulay a gapu iti daytoy ket agkasapulanda ti kanayunan a pondo para iti panakaimanihar dagiti basura ti ospital. (Bombo Florence Paytocan)
