Impasigurado ni Police Lieutenant Colonel Zacharias Dausen ti Chief ti traffic enforcement unit- Baguio nga umdas paylaeng ti bilang dagiti personnel dagitoy a maideploy para iti mapadpadaanan a lantern parade iti siudad ti Baguio.
Ti nasao a lantern parade ket mangrugi iti Session Rotonda agingga iti Melvin Jones Grand Stand iti oras ti alas sais iti malem inton dominggo, Disyembre a uno.
Iti pannakiuman ti Bombo Radyo kenni Police Lieutenant Colonel Dausen, kinunana a maideploy dagiti siyam a pulo ket walo a personnel manipud iti Traffic Enforcement Unit, sangapulo ket walo manipud iti traffic aid, dagiti personnel kadagiti nagduduma a police stations iti siudad ken dadduma pay.
Sigun kenkuana, maideploy dagitoy nangruna iti pakaangayan ti parada, ken kadagiti kalkalsada tapno maipasigurado ti nalukay a gunay ti trapiko ken ti seguridad dagiti agbuya.
Mangrugi a maideploy dagitoy iti oras ti alas tres iti malem rason a maiparikep metlaengen iti kapada nga oras ti Harisson road kas paset ti panagsaganada iti nasao nga aktibidad.
Gapu iti dayta, nagballaag iti publiko nangruna kadagiti addaan iti lugan a saan nga agparada iti Harisson Road iti nasao nga oras.
Malaksid iti dayta, maiparekep metlaeng daytoy iti trapiko isu’t gapuna a maibalbalakad a magna kadagiti alternatibo a ruta kas iti Kisad Road, Legarda Road ken dadduma pay.
Impasiguradona metlaeng nga adda dagiti emergency lane para kadagiti emergency incidents.
Manamnama met a pakipasetan daytoy dagiti sangapulo a participants manipud kadagiti nagduduma nga unibersidad iti siudad, dagiti staffs ken mannursuro kasta metten dagiti opisyal iti siudad.
