BAGUIO CITY – Ipaspasigurado ni Baguio City Mayor Benjamin Magalong ti umdas a pondo para iti implementasyon kadagiti regular a proyekto ditoy syudad.
Sigun ken Mayor Magalong, maipaspasigurado dagiti nasao a pondo manipod iti local budget kasta metten kadagiti donasyon manipod kadagiti senador, congressman, ahensya ken korporasyon nga adda iti sidong ti gobierno.
Kinunana a dagiti dadakkel a proyekto nga agkasapulan ti dakkel a pondo ket maipasidong iti public-private partnership (PPP) process.
Impannakelna a saan a narigat para iti syudad a makaala ti pondo para kadagiti proyekto agsipod ta adu dagiti interesado nga imbestor kalpasan a nakitada ti napintas a governance ti lokal a gobierno ken iti panagbalin a transparent ti syudad.
Innayunna pay nga uray makautang ti syudad iti pondo para kadagiti proyekto ket maipaspasigurado iti dagus a panagbayad gapu ta dagiti proyekto a maipatakder iti syudad ket dagiti income-generating projects.
