BAGUIO CITY – Impasigurado ni La Trinidad Councilor Belmer Elis nga umdas ti supply dagiti sabong para iti mapadpadaanan a Panagbenga Festival ken Valentine’s day.
Iti panakiuman ti Bombo Radyo kenni Councilor Elis, nakasaganan dagiti mannalon kadagiti mailako a sabong partikular ti best seller a rosas nu sadino manamnama a ngumina daytoy mangrugi iti maudi a lawas ti Enero.
Karaman kadagiti barayti ti rosas a kadawyan nga imulmula dagiti mannalon ket red, white, pink, fuchsia, yellow, ken orange.
Adda met dagiti mailaklako a blue ngem kinuna ti opisyal a dagitoy ket artipisyal a makulkulayan.
Malaksid kadagiti rosas, adda metlaeng dagiti daduma pay a klase ti sabong a manamnama a mailako kas ti grand gala weno red gala, sun flower, malaysian mums ken daduma pay.
Nupay kasta, namnamaen ni Councilor Elis nga awan ti makastrek nga imported a rosas iti lokalidad.
Impaganetgetna pay a napipintas dagiti mapatpataud a Benguet Roses, rason a masapol nga isu ti maital-o iti lokalidad.//Rob Dominguez
