BAGUIO CITY – Agtaltalinaed pay laeng iti pagagasan dagiti tallo a nadangran iti panagkarambola ti 12 a lugan nga intunda ti panakapukaw ti preno ti maysa a 10-wheeler forward truck sadiay Lower Buhagan Road, Baguio City idi kalman.
Immunan a nabigbig dagiti tallo a biktima a da Jude William Gawigaoen, 23-anyos, ni Aldrin Wagsingan Lagasca, 23-anyos ken ti maysa a masikog a ni Rhea Joy Tuazon Mariano, 32-anyos.
Sigun kenni PCI Oliver Panabang, dadaulo ti Traffic Enforcement Unit ti Baguio City Police Office, dua kadagiti biktima ti agtaltalinaed iti Baguio General Hospital bayat a ti maysa ket maob-obserbaran pay laeng iti SLU Hospital gapu iti nakaro a dunor dagitoy.
Dinakamatna a tallo met a lugan ti naan-anay a nadadael gapu iti napasamak nga aksidente .
Innayonna a naipila metten ti kaso a Reckless Imprudence Resulting in Multiple Damage to Properties and Multiple Physical Injuries kontra iti driver a ni Salvador Wakit Martin, 47-anyos a residente ti Yagyagan, Tuba, Benguet.
Maibasar iti imbestigasion ti pulisya, pasalog iti nasao a kalsada ti trak a napumpunno iti semento idi napukawan iti preno agingga a naidungpar iti maysa a lugan ken gapu iti kapigsa ti impact ket nagsasarunon a nagdidinnungpar dagiti dadduma pay a lugan a nakaparada iti igid ti kalsada.
