BAGUIO CITY – Pormalen a maidarum ti uppat a kadete ti Philippine Military Academy (PMA) ken tallo nga aktibo nga opisyal ti akademya gapu iti insidente ti panagmalmaltrato wenno panag-hazing iti uneg ti akademya a nagresulta iti ipupusay daydi Cadet 4th Class Darwin Dormitorio idi September 18, 2019.
Maibasar iti 62-page resolution ti prosekusyon, nakitaan iti probable cause tapnu makasuan ti murder ken hazing da Cadet Shalimar Imperial Jr. ti Kalinga ken Cadet Felix Lumbag Jr. ti Mountain Province.
Maipalagip a da Imperial Jr. ken Lumbag Jr. ti maibagbaga a kangrunaan a nangparparigat iti daydi Dormitorio.
Sumango met iti kaso a murder da Capt. Flor Apple Apostol, Major Maria Ofelia Beloy ken Lt.Col. Ceasar Candelaria a bin-ig a nakadestino iti PMA Station Hospital.
Sumango iti kaso a less serious physical injuries ken hazing ni Cadet Julius Carlo Tadena bayat a sumango iti kaso nga slight physical injuries ni Cadet Christian Zacarias.
Iti separate opinion ni Assistant City Prosecutor Philip Randolf Kiat-ong, inrekomendarna ti panakaipila ti kaso a hazing kontra kenni Zacarias.
Nakalanad iti resolusyon ti Baguio City Prosecutor’s Office a ti ipupusay ni Dormitorio ket cumulative result ti naigagara nga aramid da Imperial Jr. ken Lumbag Jr. ken iti gross negligence iti benneg da Apostol, Beloy ken Candelaria.
Nupay kasta, imbasura ti prosekusyon dagiti reklamo a naipila kontra kada Cadet Rey Sanopao, Cadet Rey David John Volante, Cadet John Vincent Manalo, kadagiti tactical officers ti PMA a da Major Rex Bolo ken Captain Jeffrey Batistiana ken kadagiti naglusulos nga opisyal ti akademya a da Lt. Gen. Ronnie Evangelista ken Brig. Gen. Bartolome Vicente Bacarro gapu iti kinakurang ti probable cause.
Maipalagip a pimmusay ti 20-anyos a ni Dormitorio gapu kadagiti dunor a nasagrapna manipud iti panagdangdangran a napasaranna iti ima da Imperial Jr. ken Lumbag Jr.
