BAGUIO CITY – Nangipaayen iti waragawag ti Department of Social Welfare and Development (DSWD) – Cordillera seknan iti panakahold-up ti P2.7-M a kwarta a para kuma kadagiti benipisaryo ti Pantawid Pamilyang Pilipino Program (4Ps) itay kanikadua.
Sigun kenni DSWD-Cordillera Regional Director Janet Armas, dagiti tallo a biktima a naka-alaan ti nasao a kwarta ket saan nga empleyado ti DSWD no di ket empleyado ti Lagawe Multi-Purpose Development Cooperative nga ahente ti Land Bank of the Philippines, nupay ti Land Bank ket partner ti DSWD iti panakaipaluspos ti cash grants ti 4Ps.
Inlawlawag ti DSWD-Cordillera a ti nahold-up a pondo ket para kuma kadagiti 1,269 a marigrigat nga umili sadiay Tinoc, Ifugao.
Sigun pay iti ahensia, impanamnama kadakuada ti nasao a bangko a maituloy ti panakaipaay ti kuarta kadagiti 4Ps benefeciaries apaman a maipanamnama ti lokal a gobyerno ken ti PNP ti seguridad iti nasao a lugar.
Kagiddan iti daytoy, impanamnama ti DSWD nga agtultuloy a maki-umanda iti PNP ken iti Land Bank agingga a marisut ti nasao nga isyu.
Kabayatanna, agkidkiddaw iti pammakawan ti DSWD-Cordillera iti nasao a pasamak.
