BAGUIO CITY – Kinumpirmar ti pamilya dagiti agtutubo a naiyanod sadiay Gayasi Creek, Wangal, La Trinidad, Benguet a nasarakanen ti maysa kadagiti dua a biktima iti pasado alas-kwatro idi malem kalman.
Iti panakiyuman ti Bombo Radyo ken ni La Trinidad Mayor Romeo Salda, kinunana a personal a nakitada a naipit ti bangkay iti bato ken nagaburan kadagiti basura iti nagbeddengan ti Balili ken Gayasi River.
Naiturungen ti nasarakan a bangkay iti maysa a punerarya sadiay Cruz, La Trinidad, Benguet para ti panakaiproseso daytoy tapnu maamuan ti pakabigbiganna.
Sigun pay kenni Mayor Salda, pimmigsa iti namnama dagiti rescuers a masarakan ti maysa pay a bangkay.
Maipalagip a naiyanod da Harley Rufino ken Rommel Tadena idi Agosto 15 kabayatan ti pananggandatda a mangballasiw iti karayan sadiay Gayasi, Wangal iti baet a napigsa ti ayos ti danum.
Maipalagip metlaeng a nakadanon ti search and retrieval operation sadiay Bagulin, La Union. (-with Bombo Brigitte Marcasi)
