BAGUIO CITY – Nakemmeg iti hot pursuit operation nga insayangkat dagiti otoridad ti driver ti kotse a nakailuganan dagiti marijuana a nangliklik iti checkpoint operation sadiay Lagcangeo, Bontoc Ili, Bontoc, Mountain Province idi kanikadua.
Nabigbig daytoy a ni Ryan Joe Courpin, adda iti legal nga edad, residente ti Angeles City, Pampanga.
Maipalagip a kabayatan ti panakaiproseso dagiti dokumento iti umuna nga operasion dagiti otoridad a nagresulta iti panakakemmeg ti lima a turista a nagibiahe iti adu a marijuana ket nakaawat dagitoy iti impormasion nga adda ti lumabas a kotse dagiti turista a nakaimet met laeng iti marijuana.
Pinagtalinaed dagiti otoridad ti checkpoint operation dagitoy tapnu masitar ti nasao a lugan.
Nupay kasta, idi nakita ti driver ti kotse ti checkpoint ket nagbwelta daytoy pasubli iti Kalinga Road.
Kinamat met daytoy dagiti pulis agingga a nadanunanda ti abandonado a kotse a nagresulta iti panangkemmegda kadagiti tallo a pasahero ken iti panangkumpiskarda iti 27 a pidaso dagiti bricks ken tubular forms ti marijuana nga aggatad ti nasurok P3.3-M.
Naamuan a naglibas ti driver a ni Courpin kalpasan nga imbatina ti kotse ken dagiti tallo a kakadwana.
Binirbiruk met daytoy dagiti pulis agingga a nasarakanda iti karuruutan a paset ti bantay a nagresulta iti panangkemmegda iti daytoy.
Immunan a nabigbig dagiti kakadwa ni Courpin a da Jerald Escanillas, 22-anyos; John Vincent Santos, 20-anyos ken Princess Diana Kling, 21-anyos a bin-ig a residente metlaeng ti Angeles City, Pampanga.
