BAGUIO CITY – Nasurok P63.3-M ti pakabuklan a gatad dagiti marijuana a nadiskobre, pinarut ken dinadael dagiti anti-narcotics ken police operatives iti dua nga aldaw nga eradication operation sadiay Loccong, Tinglayan, Kalinga.
Nangrugi ti operasyon idi March 11 ken nagleppas ita nga aldaw iti panangidaulo da Police Regional Office Cordillera regional director PBGen. R’win Pagkalinawan ken 503rd Infantry Brigade, Philippine Army commander BGen. Henry Doyaoen.
Pinarut dagiti otoridad ti pakabuklan a 263,600 a pidaso ti fully grown marijuana plants iti lima a disso bayat a nadiskobreda ti 87,000 a gramo dagiti napagango a puon ti marijuana ken 5,050 a gramo ti bukel ti marijuana a manipud iti maysa a kallapaw.
Maibasar iti Dangerous Drugs Board, aggatad dagiti nasao a kontrabando iti agarup P63.3-M.
Nupay kasta, awan ti cultivator a nakemmeg kabayatan ti operasyon.
Inkari met ti dadaulo ti Kalinga PPO ti walo a lawas nga agsasaruno nga eradication operation kadagiti kabambantayan iti nasao a probinsia.
