BAGUIO CITY – Naduktalanen ti rason iti pimtuk a sewerage line sadiay Holy Ghost Proper Barangay ditoy siudad ti Baguio a nabayagen nga irekreklamo dagiti maseknan nga umili sadiay.
Sigun kenni City Environment and Parks Management Office (CEPMO) Engineer II Jhomer Samoranos, nangisayangkatda iti inspeksion idi kanikadua iti pimtuk a sewerage line.
Kalpasanna ket nangisayangkatda iti dye test idi kalman kadagiti pribado nga establishimento iti nasao a barangay tapnu mabigbig dagiti pasdek a pagtataudan dagiti human waste wenno rugit a nakakonektar iti nasao a sewerage line.
Kinunana a binallaagan ken inserbi ti CEPMO ti notice of violation seknan iti illegal waste disposal kadagiti lima a pribado nga establishimento a naduktalan a nagtaudan ken pagtataudan dagiti rugit a maiturturong iti pimtuk a sewerage line.
Sigun kenkuana, iti kanito a saan nga isimpa dagiti nadakamat nga establishimento ti panakaibelleng dagiti rugit nga agtataud iti pasdek dagitoy ket posible a maisardeng ti operasionda.
Innayonn a posible metlaeng a maidarum dagiti nasao a pasdek wenno dakdakkel a multa ti maipataw kadagitoy iti kanito nga ipila ti DENR ti kaso a panaglabsing iti Ecological Solid Waste Management Act of 2000 kontra kadagiti nasao a pasdek.
Inlawlawag pay ni Engr. Samoranos no apay a nabayag a saanda a naaksionan ti nasao a pakaseknan dagiti umili ken barangay officials ti Holy Ghost Proper.
Maipalagip a nagkamang iti Bombo Radyo Baguio ni Holy Ghost Proper Punong Barangay Murphy Maspil Sr. tapnu maipadanun iti CEPMO ti kiddawda a panagaksion ti nasao nga opisina iti pimtuk a sewarage line sadiay Purok 2 ti barangayda, partikular iti sangwanan ti Tibaldo Residence a mangituntunda iti bangsit iti waig.
Sigun kenni Engr. Samoranos, naawatda ti surat ti barangay idi November 24, 2020 ngem saanda a naaksionan daytoy gaputa nagsasaruno ti panaginspeksion ken panangmintinir nga inaramidda kadagiti sewerage plants ti siudad malaksid pay a limitado a bilang dagiti personnel ti CEPMO.
Nalaos met ni panagyaman ni Kapitan Maspil iti panagaksion ti CEPMO iti arungaingda.
Innayonna a naipalawag kadakuada a saan a dagus a nagaksion ti CEPMO iti parikot ti barangayda gaputa mamati ti ahensia a kabaelan ti barangay a mangtarimaan iti nasao a parikut.
