BAGUIO CITY – Natalgeden ti kasasaad dagiti siyam a pulis a nadangran iti panagbettak ti Improvised Explosives Device (IED) nga inkali dagiti agliblibas a rebelde a New People’s Army iti kabambantayan a nagbeddengan ti Bauko ken Tadian, Mountain Province idi Abril 2.
Sigun iti maysa kadagiti nadangran a police corporal a nakauman ti Bombo Radyo Baguio, nasayaat ti panagrekoberda nupay posible a mabayagan, partikular ti maysa kadagiti kadwada a nakaro a nadangran wenno naipasidong iti kritikal a kondisyon.
Kinunana a posible a maiyakar dagitoy iti pagagasan.
Immunan a naipaayan dagiti siyam iti PNP Wounded Personnel Medal wenno Medalya ng Sugatang Magiting dagiti siyam a nadangran a police officers babaen kenni Police Brigadier Israel Ephraim Dickson, regional director ti Cordillera PNP.
Kabayatanna, naiyawid metten iti pagtaenganda sadiay Kibungan, Benguet ti pimmusay iti nasao nga insidente a ni Police Corporal Marloun Casil a maipaayan ti PNP Heroism Medal wenno Medalya ng Kadakilaan.
