BAGUIO CITY – Nakaruaren iti pagagasan ti driver ti elf truck a nangdungpar iti maysa a motorcyle rider iti deppaar ti MRR Queen of Peace Road ditoy siudad ti Baguio idi rabii.
Maipalagip a pimmusay iti insidente ti rider a nabigbig a ni Gilbert Mendoza, 31-anyos, empleyado ti maysa a punerarya, tubo ti Zamboanga City ken residente ti La Trinidad, Benguet.
Naduktalan iti imbestigasyon ti pulisya nga agpada nga agdaldalyasat iti nasao a kalsada ti motorsiklo ken ti elf truck paturong iti direksion ti Palma Street, no sadino, sarsarunuen ti elf truck ti motorsiklo.
Nupay kasta, maatap a naaddaan iti mechanical defect wenno loose break ti elf truck isut gapuna a nadungparna ti motorsiklo agingga a naipit iti kongkreto a pader ti rider.
Nadanunan met dagiti nagresponde nga otoridad ti dara-dara a bangkay ti biktima a nagsagrap ti nakaro a dunor.
Dagus met a naitaray iti pagagasan ti driver ti elf truck ken ti kadwana a pasahero.
Kinumpiskar metten dagiti otoridad ti lisensia ken OR/CR ti elf truck para iti ebidensia bayat nga agtultuloy ti imbestigasyon iti insidente.
