BAGUIO CITY – Nagkiddawen iti dispensar ti maysa kadagiti nangipablaak iti social media kadagiti ladawan ti uppat a lallaki a nagpaala ti ladawan a lamo-lamo iti lumatlatak nga Apao Rolling Hills sadiay Tineg, Abra idi kanikadua.
Iti social media account ti maysa a managan Ley Benabese, makita dagiti ladawan ti uppat a lallaki a nakatalikod a lamolamo nga addaan ti caption a ‘Hello 2020, haha’.
Dagus a nagwaras ti post iti social media agingga a nakaawat iti panagkondinar manipud iti adu a netizens gapu iti mapapati a panangbastos dagitoy iti maysa a napintas a buya.
Kalpasan ti sumagmamano nga oras ket naikkat ti nasao a post.
Nupay kasta, impasigurado ni Tineg Mayor Corinthia Crisologo ti panangisayangkatda iti kaskenan nga aksiyon seknan iti nasao a post.
Ti Apao Rolling Hills ket maysa kadagiti tourist destination sadiay Tineg, Abra a pakaimatangan ti naisangsangayan a buya dagiti ruot iti rabaw dagiti turod.
Maididiaya ditoy dagiti outdoor activities kas iti cycling wenno mountain biking, hiking, climbing, sunset ken sunrise watching.
