Rumrumwar iti dokumento nga inruwar ti Unites States Department of Justice (DOJ) a maatap a nag-hire ti pimmusayen nga sex offender a ni Jeffrey Epstein ti maysa a grupo a naka-base iti Pilipinas tapno maikat ken madelete amin nga ebidensiya ti krimen daytoy.
Maibasar iti dokumento a nakalap ti Estados Unidos, karamanen ditoy dagiti email exchanges na kadagiti kakadwana a mangbikbiktima kadagiti menor de edad.
Maysa kadagitoy ni Al Seckel, asawa ti kabsat ti sigud a gayyemna a ni Ghislaine Maxwell a kaduana metlaeng iti krimen daytoy.
Nakasuan ni Maxwell iti sex trafficking crimes idi 2021 gapu iti pakainaiganna iti krimen ni Epstein.
Kadagiti nasao nga exchange email a napetsaan iti Disyembre 7, 2010, dakdakamaten ni Seckel kenni Epstein a nadeleten iti Google search suggestion dagiti termino nga “Jeffrey Epstein jail” ken “Jeffrey Epstein pedophile,” babaen iti tulong ti maysa ngaPhilippine-based team.
Maipalagip a naarestar ni Jeffrey Epstein idi 2019 iti kaso nga sex trafficking ken panangabuso kadagiti menor de edad idiay Estados Unidos ken iti sabali pay a pagilian.
Pimmusay daytoy iti pagbaludan idiay New York iti isu metlaeng a tawen.
Rimumwar manen ti nasao a kaso kalpasan nga impablaak ti Unites States Department of Justice (DOJ) ti Epstein Files a naglaon kadagiti amin a dokumento, ladawan, videos, statements dagiti biktima, ken ebidensiya iti inararamid ni Epstein a krimen. // Bombo Karen Calpoe Sapirao
