Kidkiddawen dagiti kameng ti Volunteers Against Crime and Corruption (VACC) iti Philippine National Police (PNP) a maitantan ti panangimplementar ti “Oplan Katok”, maysa a door-to-door campaign kontra kadagiti paltog nga addaan iti expired a lisensia, bayat ti panawen ti eleksion gaputa mabalin a maaramat a pangta iti siasinoman.
Sigun kenni VACC President Boy Evangelista, “wrong timing” ti ar-aramiden nga addang dagiti kameng ti Philippine National Police.
Kinunana a nasaysayaat nu maisayangkat ti nasao nga addang nga awan ti eleksion tapno agtalinaed a kalmado ti publiko ken lehitimo ti kampania ken mapaneknekan nga anti-criminality ti ar-aramidenda.
Itay laeng kanikadua, kinuna ni PNP spokesperson Police Brigadier General Jean Fajardo a “regular function” dagiti kameng ti pulisia ti operasion kalpasan a kinuna ti Commission on Elections (Comelec) a ti operasion ket mabalin nga agtungpal iti panangabuso iti pannakabalin dagiti polis.
Para iti biang ti Commision on Elections, immanamong ti Philippine National Police a maisayangkat ti operasion ngem saan a puersaan ti pannakaisayangkatna.
Kabayatana, maibasar iti datos ti Philippine National Police, maiparparangarang a 621,395 a pakaammo ti naipaay kadagiti agtagikua iti paltog idi 2024.
Manipod iti nasao a bilang, 16,473 ti nangpabaro iti lisensiada iti paltog ken 10,676 a paltog ti naiturn over para iti safekeeping.
