Impeksa ni PCapt Mark Organo Botangen a saan a mapukpukaw ti kaso ti vehicular traffic accident iti munisipyo ti La Trinidad, Benguet a resrespondean dagitoy.
Sigun kenkuana, inaldaw ti resrespondean dagitoy nga aksidente.
Kinunana a narigat met ti agbalin a maysa kadagiti responders wenno rescuers iti aksidente.
Kinunana nga adda met ti trainings dagitoy ngem adda latta dagiti gundaway a saan a maawatan ti riknasa nangruna no nadagsen ti aksidente.
Imbinglay ti opisyal nga adda dagiti gundaway nga agresponde dagitoy kadagiti nadisgrasya a napukawan iti nagduduma a paset ti bagi.
Sumagmamano pay kadagitoy ket saanen a makaturog kalpasan nga agresponde dagitoy.
Mainaig iti dayta, kinunana pay a saan nga urayen a madisgrasya sakbay a masurwan wenno agnakem.
Kagiddan dayta, imbinglay ni Rafael Valencia, dadaulo ti 911 on Call a kadawyan kadagiti karaman iti vehicular traffic accident ket motorsiklo.
Kinunana a kadawyan a karaman iti daytoy ket dagiti nakakainom iti nasanger nga arak ken dagiti naiturogan bayat ti panagbyahe.
Gapu iti dayta, inyunay-unayda manen ti kinapateg ti BLOWBAGETS, speed limits ken dadduma pay.//Bombo Noveh Organo
