Impeksa ni Vice President Sara Duterte a saan pay a masigurado nu mapalubosan ti amana a ni sigud a President Rodrigo Duterte nga agsapata kas mayor ti Davao City.
Sigun iti bise presidente, manarimaan paylaeng ti panagsarita iti nagbaetan ti amana ken dagiti abogadona.
Nu saan a mapalubosan ti sigud a presidente nga agsapata, ti anakna a ni Sebastian Duterte a nabutosan a vice mayor ti Davao City ti agbalin nga acting mayor ti Davao City.
Mangrugi ti termino dagiti baro nga opisial inton Hunio a trenta.
Napili manen ti sigud a presidente kas mayor ti Davao City nupay naibalud daytoy iti International Criminal Court sadiay The Hague.
Improklamar ti Davao election board ti sigud a presidente a nangabak iti kina-mayor nga addaan iti nasurok 660,000 a botos.
