BAGUIO CITY – Simmuko iti tropa ti gobyerno ti walo a mannalon a miembro ti Militia ng Bayan ken Cordillera Peoples’ Democratic Front manipud iti Abra ken Mountain Province itay kanikadua.
Simmuko kadagiti pulis sadiay Tadian, Mountain Province ni alyas Bog, 37-anyos, resident ti Benguet ken miembro ti Platoon Avila ti rebelde a grupo nga addaan operasyon iti Benguet, Abra, Mountain Province ken Ilocos Sur.
Insukona metlaeng ti maysa a caliber 45 pistol ken uppat a bala para iti daytoy.
Kabayatanna, simmuko metlaeng kadagiti pulis sadiay Abra da alyas Macedo, 63; alyas Hilda, 57; alyas Ginwar, 53 ken alyas Tani, 65 a miembro ti Cordillera Peoples’ Democratic Front; pakairaman pay da alyas Darna, 48; alyas Lilia, 62 ken alyas Haydi, 55 a miembro ti Militia ng Bayan.
Kinuna dagiti otoridad a ti panagsuko dagiti nasao nga indibidual ket resulta ti serye ti panakinegosasyon ti pulisya kadagitoy ken iti pamilya dagitoy.
Maipasidong dagitoy iti umno a proseso tapnu maisaganada iti panagsublida iti sidong ti pamilyada ken maipaay pay kadagitoy ti kasknenan a tulong para iti panagrugida iti baro ken nataltalna a biag.
