Inwaragawag ti maysa nga opisial ti state health insurer a mabalin nga agnumar iti benefit package dagiti addaan ti sakit mainaig iti pudot a miembro ti Philhealth nga agkasapulan ti pannakaaywan iti ospital gapu kadagiti epekto ti nakaro a kinabara a mapaspasaran iti agdama.
Sigun kenni Rey Baleña, nakasagana ti Z-benefit package a mangipaay ti tulong nga agbalor ti P8,450 apaman a ma-admit ti maysa nga indibidual gapu iti heat stroke ken dadduma pay.
Kinuna ni Balena a karamanen ti nasao a package ti hospital charges ken professional fees ti attending physician.
Kabayatananna, inaprobaranen ti Philhealth Board ti panakaingato iti P1.4 Million a benepisio manipud iti sigud a P100,000 para kadagiti pasiente ti breast cancer iti amin nga stages ti nasao a sakit, mangrugi intun Marso 30, iti agdama a tawen.
Sigun pay iti nasao nga opisial, manamnama a mapasaayat pay ti benefits packages para iti prostate ken cervical cancer ita a tawen.
