BAGUIO CITY – Agtaltalinaed nga awan ti nailista ti Food and Drug Administration Cordillera nga report wennu kaso iti panakailako iti peke nga agas iti nagduduma nga establishemento iti Baguio City kabayatan ti pandemya.
Sigun kenni Saturnina Pandosen, Licensing Officer FDA-Cordillera, tinagiragsakna ti negatibo a resulta ti nagbalin nga operasyonda ken ti agtultuloy nga monitoringda kadagiti nagduduma nga establishimento.
Kinunana nga awan pay ti nakitada a saan nga rehistrado nga establishimiento nga aglaklako kadagiti agas gaputa maysa metlaeng daytoy nga iwanwanawanda.
Nupay kasta kidkidawenna kadagiti umili ti dagus a panangiyumanda/panangireportda iti opisina dagitoy nu adda man dagiti makitada nga establishemento a saan nga rehistrado a mangilaklako kadagiti agas tapnu mabiripikar a dagus daytoy.
Inyunay-unayna a maysa nga pamaneknek a lehitimo ti agas ket saan daytoy a nalaka nga maburbor kasta met nu awan iti dark spots ti agas ken iti kinakumpleto iti description ken prescriptions daytoy.
Kaggidan iti dayta ibalbalakadna a saan nga natalged a gumatang kadagiti sari-sari stores wennu online shops kadagiti agas gaputa dakkel ti possibilidad nga peke ken illegal dagitoy.
Gapu iti dayta, kinunana a napinpintas nu gumatang laengen kadagiti botika/klinika gaputa sigurado nga addaan dagitoy iti permit manipud kadagiti maseknan nga ahensya.
