Nakemmeg ti 20-anyos a lalaki iti naipatungpal a buy-bust operation idiay Barangay Legarda-Burnham-Kisad, Baguio City idi laeng kalman, December 7.
Ti suspect ket maysa a lalaki, single, awanan iti trabaho, ken residente iti Sitio Saddle Barangay Ampucao Itogon, Benguet.
Nakumpiskar kenkuana ti tallo a pidaso iti elongated brown package a naglaon iti maatap nga high-grade marijuana wenno Kush.
Agdagsen daytoy iti mapatta-patta a 3000grams ken agbalor iti ₱4.5million.
Malaksid iti dayta, nakumpiskar metlaeng kenkuana iti daduma pay a non-drug evidence kas iti 155 a pidaso iti five-hundred peso boodle money, maysa nga ecobag a naaramat kas drug container, maysa a unit iti brown nga iphone 6, maysa a nangisit nga ID walet a naglaon kadagiti nagduduma nga Identification Cards, ken ₱15,000 genuine money.
Ti suspect ket naiturong iti kustodiya iti Special Operations Unit-Cordillera para iti dokumentasyon ken disposisyon bayat a dagiti nakumpiskar a drug evidence ket maipaima iti Regional Forensic Unit-Cordillera para iti panakaipasidongna iti laboratoryo.
Ti nasao nga operasyon ket impatungpal ti nagtitipon a pwersa dagiti kameng iti Drug Enforcement Group-Special Operations Unit-Cordillera, Philippine Drug Enforcement Agency-Baguio City/enguet PO, PDEA Abra PO, RID CAR, RIU 14, PIU/PDEU BCPO, Baguio City Police Office-Police Station 5,ken ti Tourist Police Unit iti BCPO.//Bombo Jerwin Aquino
