Inaprobaran ti House Committee on Appropriations ti P6.793 trillion a national budget para iti tawen 2026, kalpasan ti 37 nga aldaw a deliberasyon dagitoy.
Gapu iti dayta, P255 billion manipud iti orihinal nga alokasyon ti Department of Public Works and Highways (DPWH) para iti flood control projects ket naiyakar para iti programa ti Education, ken health.
Sigun kenni House Appropriations panel Chair ken Nueva Ecija Rep. Mikaela Angela Suansing, ita a tawen ket naipatungpal ti nalawa a reporma iti proseso ti panakaadal iti budget para iti transparency ken tapno maliklikan dagiti kontrobersyal nga insertions a napasamak idi napalabas a tawen.
Innayonna met a manamnama a maaprobaran iti maikadua a panagbasa ti nasao a budget sakbay a malpas ti agdama a bulan, ken namnamaenna a maileppas daytoy iti maikatallo a panakaibasana iti panagsubli ti session inton Nobyembre.
Addaan met iti sangapulo nga aldaw dagiti mammanday-linteg tapno isumiter ti budget bill sakbay ti naituding nga adjournment iti kongreso inton Oktubre 3, 2025 para iti makabulan a recess ngem agsubli ti session iti kongreso inton Nobyembre 9,2025.
