BAGUIO CITY- Agpapaimbag ita ti maysa a taxi driver kalpasan a binagsol ti dua a lalaki sadiay Hanger Hilltop, Baguio City idi rabii.
Nabigbig daytoy a ni Dominador De La Cruz y Miru, 33-anyos, tubo ti Pangasinan ken residente ti Zamora Street, Baguio City.
Nabigbig met dagiti suspek a da Eddie Hajas y De la Rosa, 42-anyos, tubo ti Laguna, residente ti Apugan, Baguio City ken ni Joel Hajas y Aswelo, addaan ti legal nga edad, residente ti Quirino Hill, Baguio City.
Maibasar iti imbestigasyon dagiti otoridad, sinundo ti biktima ti nobyana ken paawid dagitoy iti pagtaenganda.
Pinara dagiti dua a suspek ti taxi ngem inlawlawag ti biktima a saanna a mailugan dagitoy gaputa adda ti pasaherona.
Nupay kasta, pinukpukawan dagiti suspek ti biktima ken nangisawang pay dagitoy ti saan a nasayaat a sasao kontra kenkuana ken iti nobyana.
Gapu iti daytoy, kinompronta ti biktima dagiti dua a suspek a nangitunda met iti pannakabagsolna.
Dagus a timmaray dagiti suspek iti direksyon ti Magsaysay Avenue, Baguio City ngem kinamat daytoy ti biktima.
Gapu iti tulong dagiti bystanders ket naireport a dagus kadagiti otoridad ti nasao nga insidente a nangitunda iti panakatiliw ti maysa kadagiti suspek.
Naiturong iti kustodiya dagiti otoridad ti maysa a suspek para iti pannakaipila ti kaso kontra kenkuana bayat a maan-anop ita ti kadwa daytoy a nakalibas.
