BAGUIO CITY – Imimbestigaran dagiti pulis ti panakabagbagsol ti dua a lalaki a nakatayan ti maysa kadagitoy iti sangoanan ti maysa a hotel sadiay Laya West, Tabuk City, Kalinga idi parbangon.
Nabigbig ti pimmusay a ni Norman Sinmay Anniban, addaan iti legal nga edad, bayat a ti nadangran ket ni Brix Digmo Lumbag, 22, agpada a residente ti Laya West, Tabuk City, Kalinga.
Segun iti Tabuk Police Station, nagturong ti dua a biktima iti nasao a pasdek ngem binagaan dagitoy ti gwardiya a ni William Gackkad Cayabo nga awanen ti bakante isut gapuna a pimmanaw dagitoy.
Idi rimuar ni Cayabo iti gate ket nakitana ti panagtaray ti dua a lalaki bayat nga iti kalsada ket nakaidda dagiti dara-dara a biktima isut gapuna a dagus daytoy a nagkiddaw iti tulong.
Naitaray dagiti biktima iti ospital, ken naamoan a nagsagrap ni Lumag iti adu a saksak iti nagduduma a paset ti bagina bayat a ni Anniban ket naideklara a dead on arrival.
