BAGUIO CITY – Pimmusay ti maysa a babai bayat a nakaro a nadangran ti dua pay nga indibidual iti panaka-aksidente ti maysa a dump truck a naglaon ti semento sadiay Camp 2, Kennon Road, Tuba, Benguet idi rabii ti Biyernes, August 9.
Sigun kenni PMaj. James Acod, hepe ti Tuba PNP, pasalog iti kalsada ti nasao a truck idi aksidente a naidungpar iti kongkreto a poste ti BENECO.
Kinunana a natumba ti truck agingga a naidungpar iti kongkreto nga alad iti igid ti kalsada sakbay a simmardeng idi paset ti kalsada a pasalog.
Gapu iti daytoy, nakaro a nadangran ti driver a nabigbig a ni Wilfred Roque Dollaga, 35-anyos, tubo ti Isabela ken ti kadwana a ni Edgar Abat Condes, 43-anyos, backhoe operator, tubo ti Tublay, Benguet, agpada dagitoy nga agnanaed sadiay Shilan, La Trinidad, Benguet.
Kabayatanna, narekober ti awanan biag a bagi ti babai a pasahero a nabigbig a ni Florence May Parica Thomas, 16-anyos, tubo ti Mankayan, Benguet ken agnanaed ita sadiay Twinpeaks, Tuba, Benguet.
Naamuan a naipurwak ti biktima iti rangkis ken nagdisso iti karayan ngem iti agdama ket inyawid metten ti pamilyana.
Naiturong met ti driver ken helper ti truck iti pagagasan para iti panakataming dagitoy.
