--Ads--
BAGUIO CITY – Pimmusay ti maysa nga indibidual bayat a nadangran ti dadduma pay kadagiti 24 a pasahero, pakairamanan ti driver ti maysa a parapasahero a jeep a natnag iti waig iti baba ti kalsada sadiay Mapait, Poblacion, Luba, Abra idi agsapa.
Maibasar iti report, manarimaan ti panagdalyasat ti jeep iti kalsada iti nasao a lugar idi napasamak ti insidente.
Sigun iti maysa kadagiti pasahero, liniklikan ti driver a madungpar ti sarsarunuenda a jeep a killaat a nagsardeng gapu iti aso a bimmallasiw iti kalsada.
Gapu iti daytoy, imbaw-ingna ti jeep a nangitunda iti panakatnag ti lugan iti waig.
Nabaliktad pay ti nasao a lugan a naamuan a nagtaud iti ili ti Tubo ken paturong iti ili ti Bangued.
