BAGUIO CITY – Dumanon iti 7.07 kilograms a marijuana bricks ti nakumpiskar dagiti kameng ti Sabangan PNP ken Regional Public Safety Battalion (RPSB) ti Cordillera PNP manipud iti maysa a kotse nga addaan plaka nga UIF 421 iti impatungpalda a checkpoint iti deppaar ti national road sadiay Paling, Lagan, Sabangan, Mt. Province idi kalman.
Nabigbig ti driver a ni Strawberry Berganos Acdal, 25-anyos ken residente ti Andrew Street, Multinational Village, Paranaque City bayat a nabigbig dagiti pasaherona a da Lawrence Andan Castillo, 31-anyos, mekaniko; Angel Ace Escobar Arandia, 21-anyos, estudyante ken ni Aldous Ebrio Gavina, 21-anyos, estudyante, bin-ig a tubo ti Bangar, La Union ngem residenteda ita iti Cubao, Quezon City.
Nabigbig pay dagiti kakaduada a da Christian Diaz Viluan, 21-anyos ken ni Prince Angelo Mantilla Eugenio, 26-anyos, bin-ig nga estudyante ken residente ti Bangar, La Union.
Maibasar iti report ti pulisya, manarimaan ti panangipatungpalda iti checkpoint iti nasao a lugar idi pinarada ti nasao a kotse ngem saan daytoy nga insardeng ti driver.
Nupay kasta, insardeng metlaeng ti driver ti lugan, agarup nasurok 20 a metro manipud iti checkpoint ken sadiay a kinasarita ti maysa a pulis ti driver a nangibaga a nagtaudda sadiay Buscalan, Tinglayan, Kalinga.
Impakada ti pulis no mabalinda a kitaen ti uneg ti kotse, pakairamanan dagiti compartments a kinanunongan met ti driver.
Impalukat ti pulis ti back compartment ti lugan babaen iti maysa kadagiti pasahero ken sadiay a nakita ti pulis ti maatap a maysa a marijuana brick a nabalkot iti newspaper ken transparent cellophane a naikabil iti maysa a travelling bag.
Dagus nga impaka-ammo ti nasao a pulis ti kaadda ti mapapati a marijuana brick iti uneg ti lugan kadagiti kakaduana a nangitunda tapnu ipatungpalda ti umno a proseso agingga a nakumpiskar ti sangapulo a pidaso ti marijuana bricks manipud kadagiti bags dagiti suspek.
Sumangsango dagiti nasao a turista iti kaso a panaglabsing iti RA 9165 wenno iti Comprehensive Dangerous Drugs Act of 2002.
